Barnaserkønur sálarfrøðingur til Familjufyrisitingina

Treytað av játtan er starv sum barnaserkønur sálarfrøðingur í Familjufyrisitingini leyst at søkja við setan skjótast tilber.

Talan er um fulltíðarstarv, men møguleiki er fyri at arbeiða niðursetta tíð.

Lýsing av Familjufyrisitingini

Familjufyrisitingin umsitur ymiskar uppgávur innan familju- og persónsrættin, m.a. mál um barnagjøld, samveru, hjúnaskilnað, sundurlesing, ættleiðing, faðirskap, framtíðarfulltrúir og verjumál.

Tú kanst lesa meira um arbeiðsøkið hjá Familjufyrisitingini á heimasíðu okkara www.famf.fo.

Arbeiðsuppgávur

Sum barnaserkønur sálarfrøðingur í Familjufyrisitingini verða uppgávurnar hjá tær m.a. at

• hava samrøður við børn, har fyrilit verður tikið fyri sjónarmiðunum hjá barninum.
• eygleiða samveru millum barn/børn og foreldur.
• skipa fyri og hava samrøðubólkar til børn, hvørs foreldur ikki liva saman, og foreldrasamstarvsskeið.
• veita barnaserkøna ráðgeving til foreldur, ið ikki liva saman, og børn teirra.
• gera barnaserkønar kanningar, møguliga foreldraførleikakanningar og onnur serkøn ummæli.
• góðskutryggja okkara mannagongdir við atliti at tí, ið er mett best fyri barnið.
• skipa innanhýsis undirvísing innan títt fakøki.
• gera ymiskt kanningararbeiði innan málsøkini, ið vit umsita.
• veita fulltrúum ráðgeving í sambandi við málsviðgerð.

Førleikakrøv

• Tú ert útbúgvin og løggildur sálarfrøðingur.
• Tú hevur góðar fakligar førleikar, loysir uppgávur við høgari dygd og hevur góðan kunnleika til menningar- tilknýtis- og kreppusálarfrøði.
• Tú hevur góð innlivingarevni og megnar skjótt at skapa samband og tryggleika. Tær dámar væl at hava beinleiðis samband við børn og foreldur – eisini tá ið støða teirra er merkt av stríði og kreppu.
• Tú hevur royndir við og áhuga fyri at handfara ósemjur. 
• Tú hevur hug og hegni at loysa tær umsitingarligu uppgávurnar, ið fylgja við arbeiðinum sum barnaserkønur sálarfrøðingur.
• Tú hevur góðar málsligar førleikar í føroyskum, donskum og enskum.
• Tú hevur góðar telduførleikar og gott hegni at seta teg inn í nýggjar telduskipanir.
• Tú megnar at arbeiða sjálvstøðugt – og samstundis at arbeiða í tøttum samstarvi við løgfrøðingar og onnur starvsfólk.
• Tú ert væl skipað/-ur, fleksibul og megnar at arbeiða undir trýsti. 
• Tú hevur góðar sosialar førleikar og jaligan hugburð.  

Familjufyrisitingin kann bjóða tær

• eitt fjølbroytt, mennandi starv í nýggjari føroyskari fyrisiting, ið er undir støðugari menning.
• eitt arbeiðspláss við góðum arbeiðsumhvørvi, har trivnaðurin er í hásæti.
• eitt starv í einum sterkum fakligum umhvørvi, við góðum møguleika fyri fakligari og persónligari menning.  
• høvi at vera við til at menna familjurættarliga økið.

Lønar- og setanartreytir

Starvið verður sett sambært sáttmála millum Fíggjarmálaráðið og Føroya Akademikarafelag.

Vilt tú vita meira um starvið, kanst tú seta teg í samband við Súsonnu Nordendal, virkandi stjóra, á tlf. 20 22 24, ella við telduposti til famf@famf.fo. 

Umsókn

Umsókn skal sendast til:

Familjufyrisitingin

Dr. Jakobsens gøta 21

100 Tórshavn

ella við telduposti til:

famf@famf.fo  

Umsókn við prógvi, CV og møgulig avrit av øðrum skjølum, skulu vera okkum í hendi í seinasta lagi mikudagin 1. februar 2023.

Í sambandi við setan verður barnaváttan umbiðin.

Umsóknir verða viðgjørdar í trúnaði.