Løgfrøðingur til Familjufyrisitingina

Starv sum løgfrøðingur í Familjufyrisitingini er leyst at søkja við starvsbyrjan 1. august 2021 ella eftir nærri avtalu.

Talan er um tíðaravmarkað starv fulla tíð fram til 1. august 2022.

Lýsing av Familjufyrisitingini

Familjufyrisitingin umsitur ymiskar uppgávur innan familju- og persónsrættin, m.a. mál um barnagjøld, samveru, hjúnaskilnað, sundurlesing, ættleiðing, faðirskap og verjumál.

Tú kanst lesa meira um arbeiðsøkið hjá Familjufyrisitingini á heimasíðu okkara www.famf.fo. 

Arbeiðsuppgávur

Sum løgfrøðingur í Familjufyrisitingini skalt tú í høvuðsheitum

• taka tær av málsviðgerð og taka avgerðir á familjurættarliga økinum.
• leiðbeina viðskiftafólki okkara og øðrum myndugleikum.
• samstarva tvørfakliga við skrivstovufólkini í Familjufyrisitingini um eitt nú barnagjaldsmál.
• samstarva tvørfakliga við barnaserkønu ráðgevarnar í Familjufyrisitingini um eitt nú samverumál.

Førleikakrøv

• Tú ert løgfrøðingur og hevur áhuga fyri familjurættarliga økinum.
• Tú ert arbeiðssom/-samur, hevur góðar fakligar førleikar og loysir uppgávur við høgari dygd.
• Tú ert tænastusinnað/-ur, fyrikomandi og dámar væl at hava beinleiðis samband við viðskiftafólk.
• Tú megnar at arbeiða við fólki, ið stundum eru í kreppustøðu, sum kann vera merkt av sterkum kenslum og stríði.
• Tú hevur góðar málsligar førleikar í føroyskum, donskum og enskum umframt góðar telduførleikar.
• Tú megnar bæði at arbeiða sjálvstøðugt og í tøttum samstarvi við aðrar løgfrøðingar og starvsfelagar.
• Tú ert væl skipað/-ur, og megnar at hava fleiri bóltar í luftini í senn. Samstundis ert tú fleksibul og før/-ur fyri at tillaga teg, um umstøður ella uppgávur broytast.
• Tú hevur góðar sosialar førleikar og jaligan hugburð.  

Royndir á familjurættarliga økinum ella í aðrari almennari umsiting er ein fyrimunur, men eingin treyt.

Familjufyrisitingin kann bjóða tær

• eitt fjølbroytt og mennandi starv í nýggjari føroyskari fyrisiting, ið er undir støðugari menning, og sum tú ert við at menna.

• eitt avbjóðandi, spennandi og fjølbroytt starv í einum sterkum fakligum umhvørvi, har dentur verður lagdur á at taka rættar og greiðar avgerðir og at veita viðskiftafólkum okkara góða tænastu, og við góðum møguleika fyri fakligari og persónligari menning.

• ein gerandisdag saman við hugagóðum og hjálpsomum starvsfeløgum, har trivnaðurin er í hásæti

Lønar- og setanartreytir

Starvið verður sett sambært sáttmála millum Fíggjarmálaráðið og Búskapar- og Løgfrøðingafelag Føroya.

Umsókn

Umsókn skal sendast til:

Familjufyrisitingin

undir Bryggjubakka 27

FO-100 Tórshavn

ella við telduposti til:

famf@famf.fo

Umsókn við prógvi, CV og møgulig avrit av øðrum skjølum, skulu vera okkum í hendi í seinasta lagi hósdagin 1. juli 2021 kl. 12.00.

Setanarsamrøður verða væntandi hildnar í viku 27.

Vilt tú vita meira um starvið, kanst tú seta teg í samband við Monicu Hjelm Rasmussen, stjóra, á tlf. 20 22 24, ella við telduposti til famf@famf.fo. 

Umsóknir verða viðgjørdar í trúnaði.