Skrivstovufólk til Familjufyrisitingina

Starv sum skrivstovufólk í Familjufyrisitingini er leyst at søkja við starvsbyrjan 1. august 2021 ella eftir nærri avtalu.

Talan er um fast starv og arbeiðstíðin er 32 tímar um vikuna ella eftir nærri avtalu.

Lýsing av Familjufyrisitingini

Familjufyrisitingin umsitur ymiskar uppgávur innan familju- og persónsrættin, m.a. mál um barnagjøld, samveru, hjúnaskilnað, sundurlesing, ættleiðing, faðirskap og verjumál.

Tú kanst lesa meira um arbeiðsøkið hjá Familjufyrisitingini á heimasíðu okkara www.famf.fo.

Arbeiðsuppgávur

Sum skrivstovufólk í Familjufyrisitingini skalt tú í høvuðsheitum

• málsviðgera og taka avgerðir á barnagjaldsøkinum.
• viðgera faðirskaparmál.
• leiðbeina viðskiftafólki okkara.
• innkalla viðskiftafólk til fundir og barnaserkøna ráðgeving.
• røkja fyrifallandi uppgávur á stovninum.

Førleikakrøv

• Tú hevur skrivstovuútbúgving ella aðra viðkomandi útbúgving.
• Tú hevur góðar fakligar førleikar og loysir uppgávur við høgari dygd.
• Tú hevur tænastulyndi, dámar væl at hava beinleiðis samband við viðskiftafólk, og ert før/-ur fyri at veita teimum eina góða tænastu.
• Tú hevur áhuga fyri familjurættarliga økinum og megnar at arbeiða við fólki, ið stundum eru í kreppustøðu og merkt av sterkum kenslum og stríði.
• Tú hevur góðar málsligar førleikar í føroyskum, donskum og enskum.
• Tú hevur góðar telduførleikar og gott hegni at seta teg inn í nýggjar telduskipanir.
• Tú megnar at arbeiða sjálvstøðugt – og samstundis at arbeiða í tøttum samstarvi við løgfrøðingar og aðrar starvsfelagar.
• Tú ert væl skipað/-ur, hevur evni at hava fleiri bóltar í luftini í senn og letur teg ikki  streingja av hesum. Samstundis ert tú fleksibul og før/-ur fyri at tillaga teg, um umstøður ella uppgávur broytast.
• Tú hevur góðar sosialar førleikar og jaligan hugburð.  

Royndir á familjurættarliga økinum ella í aðrari almennari umsiting er ein fyrimunur, men eingin treyt.

Familjufyrisitingin kann bjóða tær

• eitt fjølbroytt, mennandi starv í nýggjari føroyskari fyrisiting, ið er undir støðugari menning.
• góða upplæring.
• eitt arbeiðspláss við góðum arbeiðsumhvørvi, har trivnaður er í hásæti.
• ein gerandisdag saman við hugagóðum og hjálpsomum starvsfeløgum, har dentur verður lagdur á at taka rættar og greiðar avgerðir og at veita viðskiftafólki okkara eina góða tænastu.
• eitt starv í einum sterkum fakligum umhvørvi, við góðum møguleika fyri fakligari og persónligari menning.  

Lønar- og setanartreytir

Starvið verður sett sambært sáttmála millum Fíggjarmálaráðið og Starvsfelagið.

Umsókn

Umsókn skal sendast til:

Familjufyrisitingin

undir Bryggjubakka 27

FO-100 Tórshavn

ella við telduposti til:

famf@famf.fo 

Umsókn við prógvi, CV og møgulig avrit av øðrum skjølum, skulu vera okkum í hendi í seinasta lagi hósdagin 1. juli 2021 kl. 12.00.

Setanarsamrøður verða væntandi hildnar í viku 27.

Vilt tú vita meira um starvið, kanst tú seta teg í samband við Monicu Hjelm Rasmussen, stjóra, á tlf. 20 22 24, ella við telduposti til famf@famf.fo

Umsóknir verða viðgjørdar í trúnaði.