Familjufyrisitingin søkir eftir tveimum løgfrøðingum

Størv sum løgfrøðingar á Familjufyrisitingini eru leys at søkja við starvsbyrjan 1. januar 2019 ella skjótast til ber eftir hetta.

Tað snýr seg um eitt fast og eitt tíðaravmarkað starv - bæði fulla tíð. 

Lýsing av Familjufyrisitingini

Á ólavsøku 2018 yvirtók landsstýrið málsøkið persóns-, húsfólka- og arvarætt, og tað er nýstovnaða Familjufyrisitingin, ið umsitur hetta nýggja føroyska málsøkið.

Familjufyrisitingin er sostatt ein nýggj umsiting, og hon viðger nógv ymisk mál á persóns- og familjurættarliga økinum, m.a. mál um samveru, hjúnaskilnað, ættleiðing, verjumál og barnagjøld. Tú kanst lesa meira um arbeiðsøkið hjá Familjufyrisitingini her.

Arbeiðsuppgávur

Sum løgfrøðingur á Familjufyrisitingini skalt tú í høvuðsheitum:

  • Taka tær av málsviðgerð og taka avgerðir á persóns- og familjurættarliga økinum.
  • Leiðbeina viðskiftafólk okkara og aðrar myndugleikar.
  • Samstarva tvørfakliga við barnaserkønu ráðgevarnar á Familjufyrisitingini um eitt nú samverumál.

Førleikakrøv

  • Tú ert løgfrøðingur og hevur áhuga fyri at arbeiða við nevndu uppgávum.
  • Tú hevur góðar fakligar førleikar og loysir uppgávur við høgari dygd, og samstundis ert tú arbeiðssom/samur og veitir viðskiftafólki okkara eina góða tænastu.
  • Tú dugir væl at orða teg á føroyskum – bæði í skrift og talu.
  • Tú megnar at arbeiða sjálvstøðugt – og samstundis at arbeiða í tøttum samstarvi við aðrar løgfrøðingar og onnur starvsfólk.
  • Tú ert tænastusinnað/ur og fyrikomandi.
  • Tær dámar og megnar at arbeiða við fólkum, ið stundum eru í støðum, ið eru merktar av kenslum, kreppu og nógvum stríði.

Royndir á familjurættarliga økinum ella í aðrari almennari umsiting er ein fyrimunur, men eingin treyt.

Familjufyrisitingin kann bjóða

  • At tú verður við til at menna eina føroyska umsiting frá byrjan.
  • Ein gerandisdag saman við hugagóðum og hjálpsomum starvsfeløgum, har dentur verður lagdur á at taka rættar og greiðar avgerðir og at veita viðskiftafólkum okkara eina góða tænastu.
  • Eitt avbjóðandi, spennandi og fjølbroytt starv í einum sterkum fakligum umhvørvi.
  • Beinleiðis samband við viðskiftafólk og møguleika fyri at gera ein mun.
  • Góðan møguleika fyri fakligari og persónligari menning.

Løn- og setanartreytir

Starvið verður sett sambært sáttmála millum Fíggjarmálaráðið og Búskapar- og Løgfrøðingafelag Føroya.

Umsóknin

Umsókn skal sendast til:

Familjufyrisitingin
undir Bryggjubakka 27
FO-100 Tórshavn
ella við telduposti til famf@famf.fo 

Umsóknir við prógvi, CV og møgulig avrit av øðrum skjølum skulu vera okkum í hendi í seinasta lagi 26. november 2018, kl. 12.00.

 

Setanarsamrøður verða væntandi hildnar í viku 49 ella í viku 50.

 

Vilt tú hava fleiri upplýsingar um starvið, kanst tú seta teg í samband við Monicu Hjelm Rasmussen, fakligan stjóra, á tlf. 20 22 24, ella við telduposti til famf@famf.fo

+298 20 22 24
Undir Bryggjubakka 27
100 Tórshavn