Faðirskapur 

Fyri at tryggja rættindini hjá einum barni mótvegis pápanum og rættin hjá barninum at kenna uppruna sín, skal staðfestast, hvør er pápi barnið. Tað vil siga, faðirskapurin skal staðfestast.  

Faðirskapur merkir millum annað, at

  • pápin hevur skyldu at uppihalda barninum.
  • pápin hevur møguleika at fáa lut í foreldramyndugleikanum.
  • pápin kann fáa samveru við barnið, um hann ikki livur saman við mammuni at barninum.
  • barnið kann fáa eftirnavn pápans.
  • barnið arvar pápan og pápin arvar barnið.
  • barnið kann fáa sama ríkisborgaraskap sum pápin, um treytirnar fyri tí eru loknar.
Faðirskapur hjá giftum persónum

Eru foreldur gift, tá ið barn verður føtt, verður hjúnafelagi mammuna, sum meginregla, skrásettur sum pápi at barninum.

Faðirskapur hjá ógiftum persónum

Eru foreldur ógift við barnsins føðing, skal pápin at barninum staðfestast. Hetta verður gjørt við, at pápin antin

  • viðurkennir faðirskapin at barninum fyri Familjufyrisitingini, ella
  • verður dømdur av rættinum at vera pápi at barninum.

 

Viðurkenning av faðirskapi fyri Familjufyrisitingini

Tá ið barn er føtt uttan fyri hjúnalag, verður pápin at barninum biðin um at viðurkenna faðirskapin.

Vanliga mannagongdin er tann, at tá ið ein mamma uttan fyri hjúnalag føðir eitt barn, skal føðideildin (lækni ella ljósmóður) boða Familjufyrisitingini frá, at barn er føtt uttan fyri hjúnalag, og upplýsa Familjufyrisitingini navn á mammuni.

Tá ið Familjufyrisitingin fær føðifráboðanina frá føðideildini, biður Familjufyrisitingin mammuna boða frá, hvør pápin at barninum er. Mamman hevur skyldu at boða Familjufyrisitingini frá, hvør pápin er. Sí meira undir teiginum Fráboðanarskyldan hjá mammuni niðanfyri. Er talan um fleiri møguligar pápar, beinir Familjufyrisitingin málið í rættin.

Eftir at mamman hevur boðað Familjufyrisitingini frá, hvør pápin at barninum er, sendir Familjufyrisitingin fráboðaða pápanum eina Váttan av faðirskapi.

Pápin kann antin vátta faðirskapin, við at fylla út og undirskrivað oyðublaðið, og senda tað til Familjufyrisitingina, ella við at møta persónliga í Familjufyrisitingini og skriva undir oyðublaðið, og við hesum viðurkenna faðirskapin.

Verður váttanin útfylt og send Familjufyrisitingini, skal hon antin sendast við vanligum posti ella við at hon verður skannað inn og send viðfest í telduposti. GG! Váttanin skal vera skannað inn og í góðari góðsku, so alt á skjalinum er klárt og týðiligt.

Harafturat skal undirskriftin hjá pápanum váttast av einum advokati ella tveimum sannanarvitnum, við at tey fylla teigin til sannnanarvitni út og skriva undir.

Treytirnar fyri sannanarvitni eru, at sannanarvitnið skal

  • vera minst 18 ár.
  • ikki hava nakran persónligan ella fíggjarligan áhuga í tí, sum verður undirskrivað. Tað kann t.d. vera ein starvsfelagi ella ein nábúgvi. GG! Mamman at barninum verður ikki mett óheft og kann tí ikki undirskriva sum sannanarvitni.
  • hava skilt sína uppgávu sum vitni.

Møtir pápin persónliga í Familjufyrisitingini, er ikki neyðugt við váttan frá advokati ella sannanarvitnum.

Rættarmál um faðirskap

Vil fráboðaði pápin ikki viðurkenna faðirskapin – tað vil siga, vil hann ikki undirskriva váttanina av faðirskapi, ella sýtir hann fyri at úttala seg – beinir Familjufyrisitingin málið í rættin.

Familjufyrisitingin beinir eisini mál um faðirskap í rættin, um talan er um fleiri møguligar pápar, ella um tað tykist ivingarsamt, um fráboðaði pápin, ið vil viðurkenna faðirskapin, í roynd og veru er pápi at barninum.

Áseting av barnagjaldi í sambandi við viðurkenning av faðirskapi

Tá ið faðirskapurin er staðfestur, verður spurningurin um barnagjald viðgjørdur, um mamman hevur biðið um tað. 

Møguleiki er fyri áseting av hesum gjøldum:

  • Barnagjald – t.e. peningur til barnsins uppihald. 
  • Barnsburðargjald – t.e. peningur til uppihald hjá mammuni í 2 mánaðir fyri og 1 mánað eftir barnsins føðing.   
  • Føðingargjald – t.e. peningur til útreiðslur til sjálva føðingina.  
  • Dóps-/navnagjald – t.e. peningur til útreiðslur í sambandi við barnadóp ella at barnið verður navngivið.

Leiðbeining viðvíkjandi stødd av nevndu barnagjøldum sæst her.   

Til ber at bera fram ynski um áseting omanfyri nevndu gjøldum í fráboðanarskjalinum av faðirskapi. Sí Fráboðan av faðirskapi her.

 

Fráboðanarskyldan hjá mammuni

Ein mamma, ið ikki er gift, hevur skyldu at boða Familjufyrisitingini frá, hvør pápin at barninum er.

Boðar mamman ikki frá, hvør pápin er, innkallar Familjufyrisitingin mammuna til ein fund, har vegleitt verður um týdningin av at boða frá, hvør pápin ella møguligi pápin er. Mamman skal upplýsa Familjufyrisitingini, hvør pápi at barninum er, í seinasta lagi ein mánað eftir, at mamman hevur fingið bræv frá Familjufyrisitingini, um at upplýsa hvør pápin at barninum er.

Vil mamman framhaldandi ikki at upplýsa Familjufyrisitingini, hvør pápin ella møguligi pápin at barninum er, verður málið sent til Landfútan, ið innkallar mammuna til fundar. Landfútin kann áleggja bót til eina mammu, ið ikki vil upplýsa, hvør pápin at barninum er, ella hvør møguligi pápin er.

Frítøka frá at upplýsa navnið á pápanum

Til ber at søkja Familjufyrisitingina um frítøku frá at upplýsa navn á pápanum at nýføddum barni. Í slíkari avgerð leggur Familjufyrisitingin dent á, um tað verður mett at vera í stríð við barnsins tørv, at faðirskapurin verður staðfestur. Familjufyrisitingin er sera afturhaldin við slíkari frítøku, tí at endamálið við at staðfesta faðirskap er at tryggja rættindini hjá einum barni mótvegis pápanum og rættin hjá barninum at kenna sín uppruna.

+298 20 22 24

Telefontíðir
kl. 10.00-12.00
kl. 12.30-14.00
undir Bryggjubakka 27
100 Tórshavn

Avgreiðslutíðir
kl. 10.00-15.00