Hjúnaskilnaður uttan sundurlesing

Tað er Familjufyrisitingin Í Føroyum, sum gevur loyvi til hjúnaskilnað uttan sundurlesing frammanundan í Føroyum. Í Danmark er tað Statsforvaltningen.

Hjún skulu vanliga vera sundurlisin, áðrenn tey kunnu skiljast. Tað ber tó til at skiljast uttan sundurlesing, til dømis um talan er um:

  • Hjúnalagsbrot
  • at hjúnafelagarnir, orsaka av ósemju, ikki hava búð saman seinastu 2 árini 
  • Harðskap
  • Tvígiftu (bigami)

 

Hjúnalagsbrot

Vil ein skiljast, orsakað av hjúnalagsbroti, skal Familjufyrisitingin hava váttan frá persóninum, sum hjúnafelagin hevur verið ótrúgv/-ur við, sí oyðublað til slíka váttan her. Tað er bert tann hjúnafelagin, ið hevur verið fyri hjúnalagsbroti, ið kann krevja hjúnaskilnað uttan at hava verið sundurlisin frammanundan. Hjúnafelagin, ið hevur verið (ella er) ótrúgvur, kann ikki krevja hjúnaskilnað, orsakað av egnum ótrúskapi.

 

2 ára samlívsslit

Vil ein skiljast, orsakað av, at hjúnafelagarnir ikki hava búð saman í 2 ár orsakað av ósemju, skal tað skjalprógvast antin við bústaðarváttan frá landsfólkayvirlitinum ella við at fáa tveir nærstandandi persónar at vátta samveruslitið. Sí oyðublað til Váttan um samveruslit í 2 ár her

 

Harðskapur

Vil ein skiljast, orsakað av harðskapi, skal skjalatilfar vera til taks – læknaváttan og politifráboðan. Tað er bert tann hjúnafelagin, ið hevur verið fyri harðskapinum, ið kann krevja beinleiðis hjúnaskilnað uttan at hava verið sundurlisin frammanundan. Hjúnafelagin, ið hevur framt harðskapin, kann ikki krevja hjúnaskilnað, orsakað av egnum harðskapi.

Rættarvirknaðurin av hjúnaskilnaði

Við hjúnaskilnaði verður hjúnabandið endað endaliga. Tað merkir m.a., at:

  • Felagsbúgvið hjá tær og tínum hjúnafelaga fellur burtur
  • Tú og tín hjúnafelaga arva ikki longur hvønn annan
  • Støða skal takast til uppihaldsskyldu tykkara millum (hjúnafelaggjald)
  • Trúskaparskyldan millum teg og tín hjúnafelaga fellur burtur
  • Tú og/ella tín hjúnafelagi kunnu giftast við øðrum
Taka tit undir við at skiljast

Taka tú og tín hjúnafelagi undir við:

  • at tit skulu skiljast
  • treytirnar í sambandi við hjúnaskilnaðin (hjúnafelagagjald)
  • um orsøkina til beinleiðis hjúnaskilnað, t.v.s., at tit skulu taka undir við at skiljast orsakað av hjúnalagsbroti,
  • harðskapi, 2 ára samlívssliti ella tvígiftu (bigami).

kann Familjufyrisitingin skilja tykkum við loyvi, uttan at tit hava verið sundurlisin frammanundan. Beinleiðis hjúnaskilnaður (at skiljast uttan sundurlesing frammanundan) er sostatt treytað av, at tað er ein haldgóð orsøk.

Taka tit ikki undir við at skiljast

Taka tú og hjúnafelagi tín ikki undir við at skiljast og/ella um orsøkina til, at tit skulu skiljast og/ella verður semja millum teg og hjúnafelaga tín ikki rokkin um treytirnar í sambandi við sundurlesingina -  sí nærri her um treytir í sambandi við hjúnaskilnað - kann Familjufyrisitingin ikki skilja tykkum við loyvi. Er ósemja, kann bert Føroya Rættur skilja tykkum við dómi. Skal hjúnaskilnaðarmálið fyri Føroya Rætt, krevur tað, at annar av tykkum leggur mál um hjúnaskilnað fyri Føroya Rætt. Vanliga krevur tað eisini, at partarnir hava hvør sín sakførara. Hjá Ríkisumboðinum kann søkjast um fría rættargongd, soleiðis at staturin rindar fyri sakførara, um treytirnar fyri hesum eru loknar. Sí meira um “fría proces” á heimasíðuni hjá Ríkisumboðnum: www.rigsombudsmanden.fo.

Mannagongd í sambandi við hjúnaskilnað uttan sundurlesing

Tá Familjufyrisitingin hevur fingið umsókn um hjúnaskilnað uttan sundurlesing – sum bara øðrum hjúnafelaganum nýtist at skriva undir, verða báðir hjúnafelagarnir bidnir at koma til felags fund. Á fundinum skal fáast greiða á, um tú og hjúnafelagi tín taka undir við at skiljast, íroknað orsøkina til tess og at samráðast um treytirnar í sambandi við hjúnaskilnað. Á fundinum verða tit eisini vegleidd nærri um rættarvirknaðin av hjúnaskilnaði, umframt at tit hava møguleika at spyrja meira nágreiniliga, hvat hjúnaskilnaður í roynd og veru er, hvørjar avleiðingarnar eru ella um onnur ivamál.

Tá umsókn um hjúnaskilnað, uttan sundurlesing frammanundan, verður send Familjufyrisitingini, skulu hesi skjøl leggjast við:

  • Avrit av vígsluváttan
  • Avrit av føði- og dóps- ella navnabrøvum hjá hjúnafeløgunum og felags barni/børnum undir 18 ár
  • Avrit av møguligum hjúnasáttmálum
  • Umframt skjalprógv viðvíkjandi orsøk til hjúnaskilnað, uttan sundurlesing frammanundan
Treytir í sambandi við hjúnaskilnað uttan sundurlesing

Fyri at verða skildur uttan sundurlesing frammanundan við loyvi frá Familjufyrisitingini, skulu tú og hjúnafelagi tín, umframt at taka undir við at skiljast og um orsøkina til tess, eisini verða samd um nakrar ávísar treytir.

Lógarásettu treytirnar, ið støða skal takast til samstundis við beinleiðis hjúnaskilnaðin, eru:

  • Hjúnafelagagjald

Og um tit hava serogn, um

  • hjúnafelagin við serognini, skal gjalda hinum hjúnafelagnum eina góðgerð (kompensatión)


Gev gætur, at semja um treytina at gjalda hjúnafelagagjald merkir, at tit skulu vera samd um, hvørt annar av tykkum skal gjalda hjúnafelagagjald til hin hjúnafelagan, ella um talan skal vera um tykkara millum hjúnafelagagjald, ella at ongin av tykkum skal gjalda hjúnafelagagjald. Um tit verða samd um, at annar av tykkum skal gjalda hjúnafelagagjald til hin, skulu tit eisini verða samd um, hvussu longi viðkomandi skal gjalda hinum hjúnafelagagjald, t.v.s. áramál.

Eru tit samd um, at annar av tykkum skal gjalda hjúnafelagagjald, men ikki samd um, hvussu stórt hjúnafelagagjaldið skal vera, kann Familjufyrisitingin eftir umbøn taka skrivliga avgerð um hetta.

Les meira um hjúnafelagagjald her.

Mekling hjá presti

Um báðir partar vilja tað, kann, undan fundinum í Familjufyrisitingini, mekling fara fram hjá einum presti.

Gev gætur, at tit kunnu seta kross í teigin í umsóknarblaðum um, at tit ynskja at royna mekling hjá presti. Tú finnur oyðublaðið her.

Serliga um foreldramyndugleika í sambandi við sundurlesing/hjúnaskilnað

Tá ein er giftur, hava foreldrini felags foreldramyndugleika. Felags foreldramyndugleikin yvir felags barni/børnum heldur fram eftir sundurlesing/hjúnaskilnað, uttan so, at foreldrini eru samd um at seta úr gildi felags foreldramyndugleikan. Eru foreldrini ikki samd um, hvørt felags foreldramyndugleikin skal halda fram eftir sundurlesing/hjúnaskilnað, kann málið leggjast fyri Føroya Rætt. Føroya Rættur tekur síðan støðu til, hvør skal hava foreldramyndugleikan. Í sambandi við ósemju um foreldramyndugleikan, bjóðar Familjufyrisitingin barnaserkøna ráðgeving og/ella ósemjumekling – sí meira undir barnaserkøna ráðgeving.

Serligt um barnagjald í sambandi við sundurlesing/hjúnaskilnað:

Familjufyrisitingin kann áseta barnagjald, um søkt verður um hetta. Sama um sundurlesingarmálið ella hjúnaskilnaðarmálið skal viðgerast í Familjufyrisitingini ella í Føroya rætti. Sí meira um barnagjald her.

+298 20 22 24
Undir Bryggjubakka 27
100 Tórshavn