Samrøðubólkar til børn og ung, hvørs foreldur ikki liva saman

Tá ið foreldur fara hvør til sítt, kann tað ávirka børnini nógv – serliga um ósemjustøðið er høgt og merkt av nógvum stríði millum foreldrini. Børn, hvørs foreldur ikki hava livað saman leingi, ella kanska ongantíð hava livað saman, kunnu eisini verða ávirkaði og skulu kanska venja seg við støðuna sum eitt lívskor. Uttan mun til um foreldrini hava nógvar ósemjur og stríð, ella um samstarvið millum foreldrini er gott, kunnu børn teirra hava nógvar spurningar og kenslur, sum tey kanska ikki tosa um í gerandisdegnum.

Kanningar úr londum rundan um okkum vísa, at børn, ið hava luttikið í samrøðubólkum, eru minni stúrin, blíva betri til at megna avbjóðingar og broyta atferð og fáa eina meira jaliga sjálvsmynd.

Samrøðubólkarnir hava til endamáls at geva børnum, hvørs foreldur ikki liva saman, høvi at tosa við onnur børn, sum eru í somu støðu og kunnu hava upplivað nógv av tí sama. Børnini fáa møguleika at seta orð á tankar og kenslur viðvíkjandi skilnaðinum og tilveruni aftan á skilnaðin. Í samrøðubólkinum hoyra børnini søgurnar hjá hvørjum øðrum. Tey verða soleiðis varug við, at onnur børn hava tað eins og tey, skilja betur viðurskiftini í síni egnu familju og føla, at tey ikki eru einsamøll. Tað kann kennast sum ein lætti hjá barninum at tosa um sína støðu. Børnini verða eisini stuðlað, soleiðis at tey verða betri før fyri at handfara svárar støður, avbjóðingar ella viðurskifti, sum fylgja við tí, at foreldrini ikki liva saman.

Tað er ókeypis at vera við í samrøðubólki og øll børn og ung, hvørs foreldur ikki liva saman, kunnu luttaka. Tað er ikki eitt krav at foreldrini hava verið í sambandi við Familjufyrisitingina ella hava eitt mál í Familjufyrisitingini. Tað er ei heldur av týdningi, um tað er stutt ella long tíð síðan, at foreldrini fóru hvør til sítt.

Hvat fáa børnini burtur úr at vera í samrøðubólki?

Børnini

  • síggja og skilja, at tey ikki eru einsamøll, og at familjur eru ymiskar.
  • læra at skilja og dáma seg sjálvan betri, og taka sær av sær sjálvum og egnum tørvi.
  • fáa stuðul og læra at handfara sína lívsstøðu og ymsar truplar støður.
  • læra at skilja, at skilnaðurin ongantíð er teirra skuld.
Hvussu eru bólkarnir skipaðir?

Børnini verða býtt í bólkar eftir aldri við 2-3 ára aldursmuni. 6-8 børn eru í hvørjum bólki. Bólkarnir hittast aðruhvørja viku í hálvanannan tíma, 6 ferðir tilsamans.

Mett verður at barnið helst skal vera fylt 8 ár áðrenn tað fær gagn av at luttaka í samrøðubólki. Er barn tykkara yngri enn 8 ár, og tit meta at luttøka í samrøðubólki hevði gagnað barninum, eru tit vælkomin at senda okkum eina tilmelding, so frætta tit frá okkum.

Í hvørjum samrøðubólki eru ein til tvey vaksin, sum leiða bólkarnar, taka ymisk viðkomandi evni upp og hjálpa børnunum at finna ítøkilig amboð til at handfara tankar, kenslur og avbjóðingar. Tað eru børnini, sum tosa saman, meðan bólkaleiðarin er til staðar fyri at seta karmar um prátini, t.d. við spølum ella venjingum, og fyri at leiða gongdini og kveikja børnini til virkna luttøku.

Áðrenn bólkarnir byrja verður ein fundur fyri foreldrunum. Endamálið við fundinum er at kunna foreldrini um innihaldið í samrøðubólkunum, teirra leiklut og annað viðvíkjandi støðuni hjá børnum, hvørs foreldur ikki liva saman. Harafturat er endamálið fundinum at vísa á ábyrgdina hjá foreldrunum, og at virka ímóti, at luttøkan hjá barninum í samrøðubólki, fær barnið at kenna seg hava ábyrgd av familjustøðuni ella at skula finna greiðu á trupulleikum millum foreldrini.

Hvussu kann tykkara barn koma í samrøðubólk?

Barnið kann skrivast upp til samrøðubólk við at fylla út og lata okkum hetta tilmeldingarskjalið, ella senda ein teldupost til famf@famf.fo við hesum upplýsingum:

  • Navn á barni
  • Føðingardagur
  • Bústaður
  • Foreldur (fult navn á báðum foreldrunum, telefonnr., teldupostur, bústaður)
  • Hvør hevur foreldramyndugleikan (felags, mamma ella pápi)
  • Aðrar viðkomandi upplýsingar: Hvussu leingi hava tit livað hvør sær, hvørja samveruskipan hava tit, er annað, sum tit meta er umráðandi hjá okkum at vita um barn tykkara - gjarna ein lýsing av trivnaðinum hjá barninum, hevur barnið serligan tørvur e.a.?

Tað er foreldrið, sum barnið hevur bústað hjá (bústaðarforeldrið), sum kann melda barnið til samrøðubólk. Bæði foreldrini verða boðin til kunnandi fund, og tað er til fyrimuns fyri barnið, at bæði foreldur luttaka. 

Tá ið vit hava móttikið eina tilmelding, fáa tit eina móttøkuváttan. Bólkarnir verða settir saman eftir aldri og hvar í landinum børnini búgva. Vit kunnu tí ikki siga, nær tykkara barn kemur í ein samrøðubólk. Tað veldst um nær nokk av børnum eru tilmeldaði ein bólk.

+298 20 22 24

Telefontíðir
kl. 10.00-12.00
kl. 12.30-14.00
undir Bryggjubakka 27
100 Tórshavn

Avgreiðslutíðir
kl. 10.00-15.00